Liebi KISS-Lüüt

Liebi Jassfründ

Mir lueged vorwärts und nüd zrugg –

nänd vilicht nuch es Kaffi, oder sust e Schlugg.

Mir verzwiifled nüüd – mir weid hoffe.

Vilicht isch zeimals wider alles offe –

mä chu wider ane Stubete – uff ne Uusflug und hett Spass –

oder natüürli wider ane flotte Jass!

Zum Schoggibrunne bim Läderach –

e Wanderig über Wise, Weg und Bach –

e Fänz choche – e Guutschefaart „uf trab“

oder eifach ämaal e zünftige Tanznamitag.

A gmögige Ideeä sölls bi KISS nüd fääle.

Es chunnt de Ziit, womer dörfed wääle –

was macht üüs iez am meischte Spass –

e Malnamittag – Yoga oder glich e Jass?

Liebi Jassfründ, mir sind ja träniert

im Waarte und Hoffe, bis ettis passiert.

Mä macht halt anders – vilicht gu lauffe –

underwegs bi take away ettis Feins gu chauffe

wo mä däheimed am eigene Tisch chu gnüüsse

bis d Reschti iri Türe wider dörfed uufschlüüsse!

Mä macht es Gsprääch per Telifon, statt Bsuech,

oder list ämaal e spannends Buech.

Im Fernsee gits au immer ettis z gsii –

es chu au e Rosamunde Pilcher-Film sii.

Es gitt nuch mängs, wo mä chännt mache.

Aber uff ds Jasse verzichtemer nüd – wär ja zum Lache!

Vilicht gaat er ja dem Virus bald uus– dr Schnuuf!

Also ihr Liebe – gämmer d Hoffnig nüd uuf!

Ich wüntsche allne gueti Ziit, Xundheit, Freud und Spass –

miir meischtered das!

Bis zum neechschte Jass!